اخويا واختى...مع تحياتى شوشو

اهلااااا  اهلاااا  بالعيد مرحب مرحب بالعيد ...هيييييه هييييييه هيييييييييييييييه ... 

طبعا ده مش عيد اصلا بس بالنسبة ليا انا عيييد ولااا   كل الاعياد...الدراسة ابتدت ورجعت تانى لكليتى حبيبتى بيتى الاول بعد ماحصل تبادل بين بيتنا ومعاها خلاص.... ياااه  السنين بجد بتجرى بسرعة وبتحرق سعرات حرارية ودمنا بيتحرق وكل شئ على ما يرام وادعولى بقى بقيت سنة تالتة وتخصص (شهادة يا ناس )..دعوة  قليلة تحل مشاكل مشاريع واسايمنتاات كتيرة وهنيالك يا فاعل الخير والثواب..

اسمحولى اطلع برا الدرج اللى وقعتكم فيه ده بقالى كتييير اووى  وادخل جوا درج تانى ... (على اساس ان الانسان ايه غير شوية ادراج فوق بعض :D ) ... يمكن  انهاردة  هتكلم عن حاجات مكنتش متصورة انى ممكن اطلعها برا نفسى بس فعلا نفسى اطلعها عشان محدش يقع ف اللى انا وقعت فيه (مش بلاعة مفتوحة من بلاعات مصر متخافوش.. هيا اصلا مصر فيها بلاعات مثلااا مفتوحة؟؟ تشابه بلاد ياراجل وكل شئ على ما يرام قولنا )....

من حوالى  سنتين وداخلين ف التالتة اهوه... دخلت الكلية وبقيت كبييرة بقى ف اولى كلية وطولت اتنين سم  وكنت حاسة انى خلاص بكرة بعد اول محاضرة هاخد شهادة التخرج ومهندسة راحت ومهندسة جت (من الاخر خدت مقلب ف نفسى )... وكنت بعامل كل الناس على اساس ان كلهم اخواتى ف الله سواء  بنات او ولاد...

ان ان اااااااااااااااااان.....  الاحداث بقى  توالت (مش عارفة ليه بحس انى زوزو نبيل وناقص اقول صدقينى يا هانم بس عدوهالى )... المهم.. بصراحة كنت طفلة بريئة واول مرة بقى يبقى  عندى ماسنجرررر وايميل كل شوية بفتحه بقى على اساس انى سيدة اعمال.. 

وبما انى من وانا صغيرة كنت ف مدرسة مشتركة وحتى لما طلعت ثانوى  ومدرسة بنات بس او سجن النسا زى ماكنت بقول عليه مكنتش حاسة ان شئ غريب انى اكلم  ولد او اتعامل معاهم ف حدود  الادب ف مفرقتش معايا او محستش نقطة ان معايا ولاد ف الكلية وفيه اختلاط والكلام ده كله بس اللى لاحظته ان الناس جوا كليتى او الولاد او الشباب يعنى ف السن ده تفكيرهم غريب ويمكن مراهق اووى ... يعنى تلاقى شباب سنة اولى _مش كلهم طبعا _ منقسمين الى ناس كل همهم انهم داخلين الكلية فرحانين بنفسهم ويكلموا عشر بنات ف الثانية واشطة بقى (الواد فلانتينو وكل البنات حبينوه ) ودماغهم اقل شئ يتقال انها بطاطس طالعلها شعر متجلجل (هيركود عامل عاميله يعنى )...وتلاقى تانية تحس ان لو بنت قربت منهم تقولهم السلام عليكم حتى ان ممكن ياما تتشتم يااما يقام عليها وأد البنات...طبعا انا مش بجمع بس فعلا ليه بنربط بين ان الواحد يبقى ياما سايب الحبل على الغارب ياما لاء اقطع الحبل خالص!!!

وكما الحال انى وسطية ف التعامل مع الولاد طالما ف حدود الادب والدين ف اوك..ف اتعاملت مع ناس كتير منهم وفيه ناس الى الان بعتبرهم زى اخويا بالظبط وفيه ود او اخوة مابيننا اكتر من صحابى البنات كمان  طالما مش بعمل شئ يخالف العادات ولا الدين...

مريت بتجربة يمكن اول مرة اقولها علانية بس فعلا حسيت اد ايه ان ربنا بيحبنى  وان الشيطان ممكن اذكى منى طالما محطتش ف دماغى احتمالية انى بشر مش ملاك ..

يمكن كلامى يكون غريب اووى  انى اقوله بس هقوله ومش همسح ولا كلمة عشان الكلام يبقى من العقل والقلب على طول على الكى بورد.. (جيزة جيزة جيزة ..كى بورد)...

بدأت معرفتى لشاب معين وليكن اسمه اكس مثلا ... عن طريق الكلية واحدى المواقع الاجتماعية المشهورة (بيتى التالت )... ويشهد ربنا ان كل معرفتى ليه كانت لا تتعدى اسمه وسنة وقسمه وخلاص..  المهم ان حصل كلام واذ فجأة حصلت ظروف ادت ان اكس ده يبقى عندى على الماسنجر .. وعشان اكون صريحة  ف الكلام اكتر اسمحولى اسمى نفسى اى اسم..نخليها مثلا ندمانة؟؟ هيا ندمانة...

المهم ندمانة كلمت اكس واكس كلم ندمانة  وابتدى الكلام  ياخد مسار شوية سياسى شوية  ف الدراسة  شوية وحصلت مفارقات وصدف عجيبة وغريبة انا فعلا مش كنت عارفة سببها ايه...التشابه كان اقرب مايكون الى تؤام مش اتنين مختلفين عن بعض .. مع العلم ان فيه تفاوت بين شخصية اكس وشخصية ندمانة اوووى ... لكن ربك قدر ان يبقى نفس الظروف الاجتماعية ونفس طريقة التفكير واحدة وحتى الكلمة ممكن  تتقال ف نفس اللحظة...طبعا ده كان بيخلى ندمانة تفكر هوا ازاى فيه كدة وليه كدة وكان كل اللى بيخلى ندمانة تكمل كلام بعد ماخلاص الموضوعات اللى  احتمت انها تضيف اكس على الماسنجر خلصت كم الحاجات المتشابهة ديه.. وبما ان شوشو متفوق وطالع الاول على جهنم الحمراء وواخد جائزة مبارك ف الادب وكل ده.. ابتدى الكلام ياخد مجرى تاااانى خاااااااالص.. على اساس انهم اخوات!!! (اوك كل الناس اخوات ف الله بس فيه حدود للاخوات فعلا  تختلف عن الحدود المفروضة عن الاخوات ف الله)... وحصل ان ندمانة قالت كذا شئ ل اكس عن بيتها...صحابها...مشاكلها.. طفولتها البريئة طبعااا (وانا اشهد )... وطبعا اكس كذا شئ عن نفس الظروف الاجتماعية وفتح قلبه على اساس انها اخته بقى .. ومفيش مانع  من الاخت تفضفض لاخوها والاخ يفضفض اخته.. 

انا مش بتريق ولا اى شئ ولا ندمانة على الموقف ده بس فعلا الموقف ده على قد ماهوا كان صعب عليا اووى على قد ماادركت كم ان ربنا بيحبنى اوووى..وبصراحة انا غيرت من نفسى كتيير بعد الموقف ده وربنا يثبتنى بس كل اللى عايزة اقوله ان اوك انا محترمة وانتا محترم بس فعلا الشيطان لما بيدخل بيخرب الاحترام ده وانتا بتتحول لشيطان وانا بتحول لشيطانة.. وده اللى حصل..

تطور الكلام وخد اوضاع كلها اجتماعية طبعا وكلام على غرار (كلتوا ايه النهاردة وانا مش بحب ده وانتى مش بتحبى ده)...صحيح الكلام كان ف حدود الادب بما ان الاتنين محترمين لكن ليه ادى شخص حدود اكتر من حقه؟؟؟ وايه اللى يخلى شخص مش من دمى انه يبقى ف معزة اخويا اللى من دمى؟؟ على رأى واحدة صاحبتى...اخواتى ف البيت وبس.. 

وكما الحال معروف ف ان التليفون هوا هوا الماسنجر (من وجهة نظرى على الاقل )..ف  مفيش اى مانع بقى طالما اننا اخوات ان ندمانة تعرف تليفون اكس ...

وايه النهاية ؟؟؟؟ وياترى ده صح ؟؟؟

اكيد انا عارفة نهاية اللى حصل لندمانة واكس.. عايزين تعرفوا؟؟ اللى حصل ان ربنا زى بيحطلنا اختبارات وشوشو بيجى زى الشاطر يسقطنا فيها كدة..ان ربنا اكرم ندمانة واكرم اكس وكل واحد فيهم عرف حدوده ودلوقتى بيبقى فيه تعامل عادى بس لا تليفونات ولاايميلات ولا اى خصوصيات تتقال .. وندمانة مبسوطة ب ده واكس على مااعتقد مبسوط ب ده.. والاتنين اخوات اه..بس ف الله وف الدين.. ومحدش  بقى عارف بياكلوا ايه  عند ندمانة  ف البيت الا اهل البيت بس :D 

بس ندمانة لسة ندمانة ... عارفين ليه؟؟

وبما ان ندمانة =  انا ...وعندى من المقدرة انى اقول انا غلطانة ف ايه ف هقول ..

انا ندمانة عشان فكرت ف الحاجات المتشابهة بينى وبين اكس ونسيت  ان الحاجات المتشابهة ديه كانت عاملة زى الحبل اللى بيشدنى عشان اكمل كلام مع اكس واخوض ف تفاصيل مكانش  مفروض تتقال... كنت  حاطاها زى حجة انى مش بعمل شئ غلط وانه هيفهمنى .. عندى مشكلة اروح لاكس اقوله  واستشيره...زهقانة  اقوم  اروح لاكس واقوله زهقانة... على اساس انه هيفهمنى بقى بما ان 

الحاجات بيننا متشابهة اووى.. وعلى رأى ماما .. على اساس ان البنات  صحابك انقرضوا او جالهم  انفلونزا هالة ميس اندرستندنج ..

انا ندمانة مش عشان غلطت عشان كلنا بنغلط بس ندمانة عشان بشوف ناس اللى بقع فيه انا وبقول انا غلطت يقولوا لاء عااادى .. طالما انا واى ولد صحاب بس ف حدود  اشطة عااادى بقى ..

صحاب!!!!!!! ينهار اسوح...ايه ده يا جدعان من امتى ؟؟ هوا احنا مش مسلمين ولا ايه؟؟ هوا  احنا مش بلد المفروض عربى ولا ايه؟؟ ناهيك ان كل شئ  بتستورده  حتى  القران من الصين بس  برده انا لسة محدش ضربنى بالنووى وشكلى زى شكل عشرة مليون  غيرى ..ولسة مسلمة عربية ..

 

انا ندمانة عشان ظلمت نفسى و ظلمت اخويا (اللى من امى وابويا يعنى مش اكس :D )...ندمانة عشان اجبرت نفسى على انها تظلم نفسها يوم ما سمحت ليها انها تدى لغيرها حدود اكبر من المفروض تتحط.. وزى ماقال فيلسوف من فاكرة اسمه ...ليس كل شئ متاح للاخرون لانهم اخرون... انا فعلا ندمانة واسف لاكس عشان اجبرته انه يظلم نفسه..

انا ندمانة عشان سقطت ف اختبار ربنا ... انا ندمانة عشان بشوف بنات كتير وكنت جبانة انى اقولهم موقفى ده عشان محدش يفهم عنى انى حد مش كويس بالرغم من انى بشوفهم ب عينى بيعملوا نفس غلطى..

ولو فكرت شوية هندم على حاجات كنت بدى لنفسى المساحة انى احكم انها عادى ومش حرام... 

لو عادى ومش حرام ..ليه لما اتكلم على الماسنجر واضحك بصوت عالى او اهزر وبابا يدخل عليا الاودة يقولى بتذاكرى او بتعملى ايه بتخض بينما انا لو بهزر مع صاحبتى عادى مش بتخض كدة وبقوله ديه صاحبتى وممكن اوريه الكلام كمان.

لو عادى ومش حرام..ليه لما الموبايل بيرن  وبشوف الاسم بقلق واشوف حد جنبى ولا لاء  عشان ارد مع انى هقول كلام عادى ويبقى فيه سبب للاتصال سواء من ناحيتى او من ناحية اكس..

لو عادى ومش حرام ليه لما ارجع من الكلية وماما تسالنى على صحابى وتسألنى على (زمااااايلى الشباب)..اول ما تجيب سيرة اكس بحس انى عايزة اقولها فاصل ونعود..

لو عادى ومش حرام ليه انا نفسى لما بتكلم ف الكلية مع  اى زميل من زمايلى بفرق ف المعاملة بين اكس وغيره وببقى فرحانة وانا بكلم اكس حتى لو بحكيله  عن حادثة عبارة مثلاااا (اكيد مش ف مصر قولنا تشابه بلاد )..

كذا لو عادى ومش  حرام..بس نفكر فيها ....

ارجو من اصحاب النفوس الضعيفة  انهم مش يقروا البوست اصلا لو كل اللى هاممهم مين اكس ده او لو خيالهم يوحيلهم انى داعية ..

انا مجرد واحدة ضحية لنفسها وربنا ادالها من القوة انها تعترف عن موقف ممكن لو حد قراه يستفيد منه.. انا مجرد واحدة بتحترم كل الناس وكل زمايلى بس سوورى لا اقبل الصحوبية ولااقبل ان يبقى ليا انتيم ولد .. انا مجرد واحدة وسطية ف التعامل مش بقول لا بابى ولا مامى وده البوى فريند بتاعى ولا بقول ابى وامى (على الرغم من ان ده الصح بس ربنا يهدينى بقى ) ومانعة اصلا الاختلاط بينى وبين اى زميل ليا وبقيم عليه الحد لو كلمنى (لو حد عدا حدوده بصراحة نفسى اجرب احساس الاكياس السودا وسكينة الجزار ديه :D واقيم عليه الحد .. طيبة انا بقى ..نياهاهاهاهاهاها )..

اولا واخيرا انا واحدة...ندمانة ..

وسلام بقى الميكروباص وصل اخر الخط ( جيزة جيزة جيزة كى بورد :D ).