على جنب يا ريس

مسااااا الخيرررر   يا حليوة يا مدلعنى ( من مسرحية سيدتى الجميلة تقريبا )

يمكن العنوان غريب بس انا اقصد بيه كذا ريس وكذا جنب وقصدى هيبقى مفهوم لما اكمل كلامى كله...
بقالى كتير مش  دونت وكتبت وده مش كسل ولا حاجة بس عشان احيانا بيبقى جوا كل واحد فينا كلام مش عارف يحوله حروف وجمل ..كلام محسوس مش ملموس عشان يتكتب ..حاجة كدة على غرار ايدولوجية (على اساس انى بحس بيها زى الصداع مثلا!!! )..ماعلينا من كل ده مش عايزة ارغى كتير عشان ,,,,مفيش سبب بس مجرد احساس ...

حصل معايا موقف  امبارح وانا رايحة كليتى ..وطبعا بما ان نص سواقين التاكسى  لما بقلهم حاسبات ومعلومات بيبرقولى على اساس انى مثلا قولت صواريخ ورشاشات ..صفائح ومعلبات (يمسيكى بالخير يا شيرين يارب..صفائح ومعلبات قسم تونة على رأيها ) ف بقول فنون تطبيقية وبريح نفسى ..
وبما انى خبيرة ف جميع انواع المواصلات العامة والخاصة ف مبقتش بركب اساسا غير تاكسى (وبيتخرب بيتى اكيد) عشان مواقفى البطولية مع المواصلات التانية .

فلاش باك سريع مع مواقفى البناااءة... اضاءة خافتة زى ما بيقولوا مع تنميل ف الرجلين وتبريق ف السقف (suspense suspense ya3ny ) ...
اول مرة اتوبيس :  انتظار ساعتين وشوية ف عز الشمس الحارقة لحد ماكنت هفرفر خلاص (من مصطلحات وائل الصحاح ) وبعد كل ده شرف الاخ اتوبيس وافتكر ان ساعتها الاجرة كانت جنية تقريبا .. وركبت..شوية وعينى غفلت بسبب الشمس اللى لوحت نافوخى (وائل برده ).. صحيت ولله الحمد  على صوت كمسرى عظيم عظيم يعنى ..لدرجة انى حسيت اننا رجعنا ايام الديناصورات...وطبعا زى ما متوقع...اتقلبت يارجااااااااااااااااااااااااااالة ... بس بصراحة الراجل كان عنده دم وسابلى جنية اروح بيه ..يعنى خلاص بقى مش لازم تبذير ده جنية بحاله اتقلبت ف ايه بقى..هوا انا مش صعبان عليا حاجة  غير صورتى وانا ف ابتدائى لما كان شكلى يدى على زينات صدقى كدة على زوز نبيل  ..يااااه كانت صورة عظيمة وعلى طول معايا حتى لما روحت قولت هضحى عشان اعمل كارنية المدرسة  المدرس قاللى خسارة  الصورة ديه خليها معاكى يا حبيبتى ..وسلميلى على بابا وقوليله دية مدرسة مش بيت رعب يا حبيبتى وخلاص المدرسة هتقفل لحد رابعة ابتدائى ..ف شوفى بقى هتروحى فين..(على اساس مدرسة نص ابتدائية طبعا..عاااتى..بتحصل ).

اول مرة مينى باص : كنت ف اولى جامعة  وعاملة فيها  سبع رجالة ف بعض وقال ايه مش مشكلة  هقف مش لازم  اقعد (طراووة طبعا اوعى حد  يفتكر ان مفيش مكان وتلاقى برده يقولك فيه مكان ورا ..وبعد كدة يا فكييك..اقف يا حلو..لا لالاااااااا..ديه تشابه بلاد مش عندنا الحاجات ديه ابتااااااااا )..وطبعا بما ان الاطفال احباب الله وطيبين وحلوين (هما اللى بيقولوا مش انا يعنى )...لقيت مرة واحدة بتاع عشرة  خمشتاااشر لبانة على تشعتاااشر بونبونى والمفروض انى اشترى بقى وهااتك يا تحاايل ...عشان خاطرى ومكالتش وتلاقى اصلا الاسطوانة ديه كانت ف كتاب كيف تصطاد زبونااا عبيطا ف منهجهم ...وياويلك يا سواد ليلك لو قولت معيش فكة..تلاقى فكة خمسين ... مية...200 كمان ..(اييه...رزقهم هتبص للكلام الفارغ ده والمبالغ ديه ولا ايه؟؟ ..دور كويس هتلاقى خمسين جنية مخبيها ف الشراب عشان مش تطير طبعا.. ولو لقيت...صدقنى هيخلصوا قريب متفرحش :D ) .. المهم عملت فيها طبعا معيش فكة .. على اساس فوتوا علينا بكرة يعنى..وف الاخر برده اتدبست واشتريت.. انا مش مدايقة انى اشتريت..انا بس مدايقة من انى بعد مافرحت باللبان لقيته منتهى صلاحيته من ساعة رئاسة مبارك الخامس عشر ...بس الحمد لله زى مانا قلبى طيب ..وبعز الكلاب معزتى بالظبط لابو رجل مسلوخة .. اتبرعت بيهم لكلب ...اهوه الرفق بالحيوان برده..ايييييه...ايااام ..

طبعا فيه وسيلة  حلوة جدااا اسمها التوك توك.. وليها معايا ذكرى احلى من كل دول بكتييييير ..(انا موتت موتات احلى من كدة بكتير ).

اول مرة توك توك : كنت رايحة درس ميكانيكا (نفس معزة الكلب بالظبط )...وبعد الفطار بقى وف منتهى الانتعاش لدرجة انى صحيت على صوت بيصرخ  و ولا هامنى ابداااااااا...كملت نوم .. اتارى يعينى هيثم (صاحب التوك توك ).. اتقلب  بيه التوك توك وانا نايمة ومش واخدة بالى خااااالص .. واللى انقذنى كتاب الميكانيكا اللط(تش)ييف  .صحيح رب ضارة نافعة .

طبعا بعد  كل الحوادث ديه توجهت الى التاكسى ..حماية وامان الملاين ..ومصر للتأمين..وكل الكلام اللذيذ ده .

وزى اى يوم ركبت متجهة (ميكانيكا برده ) للكلية .. ركبت التاكسى .. مع راجل شكله يدى على سامى العدل بالبتاعة البيضا اللى عاملة زى عرف الديك ف شعره ديه (بفكر اتبرعله ب صبغة كنوع من الزكاة للفقراء الفنانين طبعا )... وركبت ودار الحوار اللذيذ ده..

اه نسيت اقول .... الراجل كان شكله مقهور ف ليكن الراجل اسمه مقهور ..وانا مقهورة.. (عشان بتوع الملكية الفكرية مش يبقى ليهم حجة بقى على كتاباتى العظيمة (اللى انا بس اللى بقراها تقريبا :D )).

مقهورة : السلام عليكم ورحمة الله وبركاته..فنون تطبيقية ؟؟

مقهور : وعليكم السلام..ديه فين ديه ان شاء الله طيب ؟؟
- بعد الجامعة كدة بعد شارع الامن المركزى اول يمين ..(ابتسامة عريضة كنوع من التأثير عشان يقبل .. خودعة يعنى ).

- أمن مين !!! اه طيب ...اركبى اركبى .

- معلش يابنتى اصلى مش من هنا ومش عارف الشوارع اصلا.

- ولا يهمك يا حاج عادى...الجيزة نورت (على اساس ان النور بيقطع  سبع مرات بس ف اليوم ).
وعرف انى  ف حاسبات مش  ف فنون وحكيتله القصة كلها :D
- الله يخليكى ..حاسبات ديه حكومية ولا معهد خاص..

-معهد!! (شكلى هقلب على الراجل ده )..لاء كلية حكومية مصرية عادية (ش . م . م ) .. وبتاخد علمى رياضة وعلى فكرة من كليات القمة كمان .
وبعد كلام كتير عن الكلية .. وعشان مش احيد  (حلوة احيد ديه صح؟؟ ) عن الموضوع الاساسى (اللى  هوا انا مش عرفاه اصلا :D ) .
- امال حضرتك من فين يا حاج؟؟

- من ....... (تبع الحقوق برده :P ) ... بس بلف ف شوارع ربنا  عشان برده الواحد يبقى تاكسجى ..مش تاكسجى على كبر زى .

- ازاى يعنى ؟

- يعنى ديه مش شغلتى اصلا..انا اصلا  كنت ف ادارة البعثات قبل ماتتولدى وطلعت معاش  وبشتغل بس عشان خاطر المعاش بيجيب كام رغيف عيش (هنا افتكرت ضحايا الطوابير مش عارفة ليه .. طوابير عيش مثلا؟؟ ).. واهوه ربنا يقدرنى وولادى يخلصوا تعليمهم.. عندى وائل (غير الصحاح على فكرة )..خلص صيدلة وبيشتغل ..وعندى خديجة (اموت واعرف ازاى وائل اخو خديجة؟؟ على اساس ان سحر تجيب عبد العال مثلا على رأس سهير البابلى !! ) .. وهيا لسة ف خمسة طب عين شمس ..وعندى رقية (وائل ده اكيد اسم الشهرة الاسم الحقيقى  تامر مثلا ).. ف تانية طب..وحضرتك لسة هتقدمى ولا ف سنة كام يا بنتى؟

- انا رايحة  تالتة يا حاج.. ادعيلى بقى ..ربنا يكرمك يارب ويكرم رقية وخديجة يارب ويكرمك..بس هوا صحيح بعثات مصر للخارج كتير على كدة ؟؟

- يابنتى ان كان على اللى عايز يسافر  ..تقريبا البلد كلها عايز تهاجر ..بس اهوه.. الحمد لله على كل حال. سيبك ان الاحوال لا تسر عدو ولا حبيب (افتكرت هنا وزارة الداخلية مش عارفة ليه ).. بس اهوه الحمد لله..زمان ايام ما كنت ف الجيش سنة 69..كنا بناخد اتنين جنية وخمس وستين قرش وكانوا اهوا الحمد لله ..وبعدين لما بقيت موظف كبير بقى مرتبى عشرة جنية و20 قرش ..وكانوا مكفين ..دلوقتى شوفى خلاص الجنية زيه زى الشلن .. بس اهوه الحمد لله...انا مش فقير والحمد لله .. بس مبقتش فارقة فقير من غنى خلاص كله بيشتكى ..والله لسة اول امبارح كنت بشوف الصور وكنت بتحسر .. ايام جمال عبد الناصر كانت الدنيا لسة بخير وتعرفى تمشى ف مصر ديه كانك ماشية ف شقتك  وتروحى وتيجى .. وحتى لما جه السادات برغم  ان الدنيا بقت شوية زحمة بس كان لسة فيه خير وكان فيه نيل الواحد يعرف يمشى من عليه ف اى وقت من غير ما يقلق ولا يخاف..دلوقتى حتى الطريق اللى لسة عاملينه من صفط اللبن ده كنت عليه امبارح واتقلبت عربيتين..وما ليكى عليا حلفان .. واحدة  كانت لسو نوفى (جديد يعنى بس تبع وائل )..والتانية اهوه نص لبة (وائل بس بتاع التسالى على اول شارعنا ).. الواحد بقى بيمشى بيقول يارب ارجع بيتى سليم من غير لا ظابط يبقى صايم وجايب اخره وتلاقى نفسك دافعة 200 جنيه غرامة ازعاج بسبب الكلاكس..ولا يطلعلك فاتورة التليفون ولا الكهرباء اللى بيقطعوها ديه قبل معاها ومتعرفيش تجيبى الفلوس منين .الله يرحمك يا سادات يوم ما قولت هتأمم السد العاللى ..ياااه..انا كنت بشوف يوميها ف التليفزيون اللى كنت جايبه ب رخص التراب يوميها ومكنتش مصدق.. ايااام ...ادخل على اى حتة يمين ولا شمال؟؟ مع انها مش ناقصة شمال.. كفاية الدنيا ماشية شمال من حوالينا ..الحمد لله على كل شئ بس ربنا يستر ومتتقلبش ف الاخر.. الا صحيح متعرفيش هيبيعوا الغاز لاسرائيل بكام؟؟

- بيقولوا 14 مليار جنية يا حاج بتسأل ليه ؟؟ ايه تعرف حد يدينا ارخص.

- هههههه...وهما دول حد يعرف اصلهم يابنتى.. انا بشوف كان ممكن نبنى كام مدرسة بالفلوس ديه ..عشان ولادك واحفادى لو اصلا كان فيه مدارس ساعتها.

- والله انتا راجل طيب يا حاج.. بس مش لما يبقى فيه تعليم اصلا؟؟

- ها؟؟ (وش مصرى بمعنى متوديناش ف داهية وائل عايزنى )...

-ههههههه...مفيش يا حاج..ربنا يكرمك ف رزقك ويخليلك ولادك يارب.. على جنب يا ريس..

ملحوظة : يمكن كلامى كان كتيير اووى المرة ديه بس انا بجد اختصرت تلات ارباع كلامى مع مقهور واختصرت كتيير .. وزى ما بيقولوا ف المسلسلات..اى تشابه بين الاحداث المسردة والواقع الخارجى ليس الا مواكبة  الدول المتقدمة وتطورات العصر وبرنامج السيد الريس (اكيد عم مقهور هيكون مين يعنى ؟؟ )...

يلا انا هنزل هنا .. على جنب يا ريس ;) .

من درج الذكريات... بطاطس محمرة :D

انا جييت انا جيييت انا جيييت.. مش عايزة اسمع هتاف ..مش عايزة اشوف تنطيط :D_ (انزحة للمرة التانية بقى :D )

يمكن كلنا بنحب البطاطس المحمرة .. او الشيبسى .. على اختلاف اشكالها بقى مضلعة ولا مش مضلعة عشان شركات الشيبسى 

مش ترفع عليا قضية بقى انا مش ناقصة . 

بس مين فين  بيفتكر سمر وامير وميس وفاء والحقنة والجرى وسط الفصل وجدول الضرب؟؟

ايه كل الكلام ده؟؟ ديه ذكرياتى مع البطاطس المحمرة :D

وااااااادى قعدة يعنى انا ورايا ايه يعنى؟ انتوا وراكوا حاجة؟؟ طيب بما ان وراكم انا  قعدت اهوه :D

من حوالى 13 او 14 سنة كدة ... ايام ما كنت ف كى جى وان (بدل نسمة كى جى تو هالة كى جى وان..امال ايه ..هيا يعنى نسمة 

احسن منى !!...حكم ).... كنت معروفة ف الفصل ف البطاطس..تقريبا  اشهر  من فارم فريتس..كنت الوجبة الاساسة بتاعتى 

ساندويتش بطاطس شيبسى وواحد بطاطس بانية... وكنت انا الموزع الرسمى ف الفصل. ومن هنا بدأت علاقتى ب سمر ...

فلاش باااك سريع كدة مع دمعتين على الخدين :(

سمر ده يبقى اسم اول بنت عرفتها والمفروض انها  كانت صاحبتى (ماما اللى فاكرة مش انا ) والمفروض انها كانت بتاخد 

سندويتشاتى بقى بما انى طيبة .

وبما انى من يومى وانا امتاز بالبراءة والافكار البريئة  الطفولية طبعااااااااااااااااا  استغليت الفكرة ديه احسن استغلال 

كان عندى ميس اسمها ميس وفاء ... (الحمد لله الذاكرة شغالة شوية اهوه..امال بتعطل ليه ف الامتحانات مش عارفة !).. كانت 

بتحبنى لدرجة انها دخلت معايا سباق خيل ف الفصل كله عشان تدينى حقنة الحصبة الالمانية او الشوكية حاجة  كدة  اخرها تة 

مربوطة وهه مربوطة (مش عارفة ايه الربطة السودة ديه..انا قربت اتربط جمبهم )... وانا طبعا بما انى طول عمرى جدعة مع 

صحااابى وبسلف سمر ساندويتشات البطاطس استغليت ده  عن طيب خاطر وقصيت شعر سمر  واديتلها توكة من توكى (كرم كمان 

اهوه) وخدت الحقنة مرتين بدلا منى (اهوه مناعة برده ).. بس مكنتش اعرف ان سمر عندها حساسية والله :(

اعرف منين يعنى .. مدخلتش انا كلية طب قبل ماادخل كى جى وان ..

تانى يوم  عدى ب سلام  تالت يوم بردوا شفته بيعدى وسلم وعدى.. رابع يوم لقيت سمر بس على احمر شوية والحمد لله الخصلة 

اللى انا قصيتها غلط ف شعرها وكانت مبينة فروة راسها ماماتها  غطيتهالها ب كحكة زى برج القاهرة (ده يثبت كفاءتى ك كوافيرة 

طبعا )

طبعا طنط كانت سكرررررررررررر معايا خصوصا بعد ما عرفت وضغطت على سمر انى انا اللى خليتها تاخد الحقنة مرتين لاء 

وكمان قصيتلها شعرها جرسون على كاريه (احدث صيحات الموضة ساعتها على فكرة مش من عندى يعنى )... وسمر وراها تجر 

اذيال الخيبة (خدناها كدة ف العربى تقريبا )...وواضح انها اتأثرت ووقعت تحت ضغط عشان تعترف .. وانا عاملة نفسى نااايمة وانا 

عاملة نفسى نااايمة.. احم احم اقصد  قاعدة طبعا اسددددددددددددد ولا يهمنى انا عملت ايه يعنى... بس على ماافتكر انا ساعتها 

جالى دور ماما انا بطنى وجعانى ونزلت قعدت ف اودة الالعاب تقريبا( اييه!! رياضة)... المهم  ده  كان اول موقف ليا وتاريخ 

مشرف ف المدرسة ولازلت اذكر ميس وفاء وهيا بتجرى ورايا عشان اخد الحقنة  غصب عنى (بما انى شجعااااعة )... بس اللى 

حذ ف نفسى قووى ان بعد ما ماما عرفت الحوار  بقت تحطلى جبنة بدل البطاطس البانية (شوفتوا انتقام ربناااا منى ).... 

اما بقى حوار امير ده ياااااااااااه ... ( قلبتوا عليا المواجع والله )....  بس مرة تانية بقى عشان البطاطس على النار وتقريبا تقريبا 

تقريبا ...3 تقريبا ... استوت لدرجة انى شامة ريحة نفاااذة اووى (بما انى طباخة شاطرة بقى ).. يلا اشوف وشكم بخير ..

ومتنسوش تدعو ل سمر  مع انى مش عارفة والله هيا راحت فين ..حيث انها (عااادى ..انا احيانا بقلب على سيبويه )... كانت اول واخر سنة ليها ف المدرسة ومشفتهاش من ساعتها .

بس والله شكلها كان حلو بالكحكة :D

نيااهاهاهاهاهااهاهاها ... ضحكة شريرة (فاضلى مقشة واقلب على سونيا اللى  غلبت عم دهب ).

يلا سلام ;) 

انا أتأنزح... اذن انا موجود!!!

انزحة .... مفهوم  جديد دخل  وربع وحط  رجل  على رجل ف مصطلحاتنا اللغوية اللى عايزة معجم  تامر الصحاح عشان اى حد غريب او مش من الجيل ده يفهمها .


يعنى ايه بقى انزحة -(مش عارفة ليه سؤال  ماهو انزحة فكرنى ب ماهو المنطق ف قولت خلى البساط احمدى احسن واقول يعنى ايه   احم احم) -
الانزحة يعنى  مرة واحدة  وانتا بتتكلم  مع واحد  (صاحبك _ قريبك  _ اى حد من  اللى ليه بطاقة شخصية او حتى كارنية مدرسة) .  يقولك يا شيخ انتا لسة عارف ده؟؟ او انتا  بتعمل كدة بس؟؟ واتك على بس ديه اووى عشان بتطلع ب طريقة تحس انه المانى على اجريجى كدة 


الانزحة ب اختصار انك تحسس اللى  قدامك   انك عملت وسويت وطلعت  جبل ايفرست وعملت ملوخية ب نكهة الكنيلونى مع اضافة فرخة مشوية  ب تلات  عيون  جاية من  القرن الخمسة وستين من كوكب  ما تزوقينى يا مايا .....  ياااه تصدقوا جوعت :D
اللهم انى صايمة  :D


انا  فعلا مش  عارفة  ليه يعنى اى حد   انزوح -( صيغة مبالغة  على وزن فعول) -  بيتأنزح...ده مرض يعنى ولا وباء ولا صحى من النوم  لقى نفسه كدة؟؟


اه انا ممكن اكون حد  من الناس اللى لما بعمل حاجة  وبحس انى عايزة اتفشخر -(من فعل فشخر )-  بكون مبسوطة  الحمد لله  يمكن عشان ده نادرا ما بيحصل _ (احم احم) _ قصدى يعنى الحمد لله  مش  بقلل من حد  ولا بتأنزح  عشان ب اختصار
كلنا مولودين  ب نفس  الذكاء او ذكاء  متقارب وخبرات  الحياة  ب نشوفها كلنا او اغلبنا  و حتى  العباقرة  اللى  بيحبوا الانزحة 
كانوا ف يوم من الايام  ناس عادية  بتسأل ازاى وتدور وتعرف  متخلقتش يعنى عارفة  اللى بتتأنزح بيه ده .


على رأى ناس كدة  بترغى زى حالتى _ (عادى انا دماغى مش ميمورى تيرااا  بايت )_  


مش هرغى كتير عشان كفاية اووى كل اسبوع  وكالة الرغى  الدولية   بتدينى  نيشان  وكاس الرغى العالمى  وبصراحة عشان معلوماتى قيمة  وعايزة اتأنزح بيها ف مكان  تانى  بقى - (شوفتونى وانا  بتأنزح :D -). 


حصل معايا موقف  لذيذ   من كام يوم  كدة :


بنوتة  لذيذة  كدة  جارتنا  عمرها  خمس او ست  سنين ... حاجة  كدة زى نسمة  كى جى تو ف فيلم مش فاكرة اسمه ... قاعدة  ف امان الله  بتكلم  معاها وبهزر  وبنرغى ف احوال مصر ...(مش سياسة متخافوش معقدتش البنت بكرة تكبر وتتعقد لوحدها) ... اذ فجأة رن موبايلها  اللى اصغر اساسا من كف ايديها اللى مش باين من  كمها .....( E-SERIES )...  اللى انا معرفتهاش  غير ف اولى جامعة ...
وبتكلم واحد زيميلها ...(ايه زماااايل عاااااتى).... عن الويب سايت التحفة اللى عاجبها وبتعمل منه داونلود على طول وبتقوله اقابلك بليل على الفيس بووك بقى  عشان مشغولة  دلوقتى وبتكلم مع ابلة ... (كنت عايزة اضربها ب اى حاجة بسبب ابلة ديه بس يلا رمضان كريم).. سلااام  يا ساسو...
وانا ب كل  براءة .... وشفافية ....ونية صادقة,,,, كل ده كدب على فكرة  متركزوش.. بقولها  ساسو ديه صاحبتك؟!!!




الجيل الرابع :  لا يا ابله ده واحد صاحبى  معايا ف الكلاس وكان بيكلمنى عشان عايز لينك عجبه انا عملتله شير على الفيس بووك .
الجيل التالت ..(انا يعنى ...  مشوها تالت بقى )  :   وده لينك ايه يا حبيبتى؟؟
الجيل الرابع : ابدا  حاجة بسيطة كدة  عن  التكنولوجى .. تقدرى تقولى لاب توب  بيتقلب عربية ... ان شاء الله اجيب  واحد السنة اللى جاية لما بابا  ييجى .
الجيل التالت: جتنا  خيبة ف حظنا الهباب -( ف سرى طبعا عايزين البنت تقول ايه منفسنة مثلاااااا؟؟ )- بجد يا توتتى ؟؟ ماشاء الله وده  عرفتيه منين يا سكر؟؟
الجيل الرابع : توتتى!! وسكر!!! لاء ياابلة بليز انا مش شايفة ان ده ينفع يبقى اسلوب كلام  بيننا .
الجيل التالت : نعم يااختى!!! - (اختى ديه كنت بجز على سنانى ف الحمد لله مش طلعت )- نعم!! 
الجيل الرابع : ايوة ياابلة زى مانا بقولك ياابلة  بعد اذنك نادينى ب اسمى اوك انا موافقة او  ب ashokian!
الجيل التالت : ashokian!!!! وديه يعنى ايه ؟؟
الجيل الرابع : ديه  جاية من كذا كلمة ف بعض ..منها اول اكاونت كونت ليا على كونكر وانا كملت الاسم لما عملت الشلة بتاعتى كلها اشوووك  على كونكر . يعنى الاسم الحركى بتاعى مع صحابى على النت ...يااه كانت ايام  ده انا ضحكت على ناس كتيير اووى وسرقت اكاونتس بالاسم ده  انا وساسو وناس كتيير .. اه على فكرة  ساسو ده برده اشوك بس رقم  14  عشان لسة جديد معانا ف الجو. ما تيجى ياابلة معانا ؟؟ ده احنا بنعمل حاجات لذيذة اووى ومش عيالى خالص بجد صدقينى انا عارفة فرق السن  ممكن يخليكى تدايقى عشان حضرتك عارفة اكيد كل ده واحنا لسة beginners.. بس trust me ... مش  هتندمى never... كلنا شطاطير -(جمع شاطر عندهم) - ده  حتى وائل لسة  عامل هااكنج -( طبعااا ديه اول شئ عارفاه على رأيها وعلاقتى بيه زى علاقتى باللغة الصينية )- ودخل على البى سى -(الله يرحم الحاسب الالى اللى كنا بناخده ف المدرسة من زر ابدا انقرا قائمة البرامج)- بس على مين  انا كنت مظبطة الفاير وول بتاعتى ف قفشته - (الحمد لله حاجة اعرفها) - ماتيجى ياابلة بجد؟؟
الجيل التالت - (مع انى اشك انى كدة انفرضت مع الديناصور ف يوم واحد وكام يوم اربع كمان انا فاكرة )- : ايوة يا حبيبتى  بس انا معرفش ايه كونكر  ديه عشان ا join -(اشمعنى  هيا يعنى مانا متعلمة برده وبتكلم انجليشى اماااال ايه )-  وابقى  Active member - زيك وزى ساسو - (وربنا لاخرج من بيتهم مخليه لسانها ناحية واحدة بس يمين بدل الانجليزى اللى فرحانه بيه ده) - .


وارتعدت  فرائصى من جراء تأثير الصدمة الهلامية المهلبية الاستراتيجية .. اى حاجة بقى  متركزوش انا  صايمة .  الا صحيح فرائص ديه اللى جمب الركبة؟؟ 
بغض النظر عن الجملة اللى فوق ديه البنت وشها جااب احمر  وفوشيا وكل درجات اللون البمبى كمان كما لو انى قولت مثلا هيا ثورة  19 حصلت امتى . 


الجيل الرابع(بامتعاض ) : ايه؟؟؟ ازاى يعنى؟؟؟ وقااامت واقفالى عشان تورينى طولها  وايديها ف وسطها -(كان نفسى يكون ف ايدى الة زمن ارجع ولا اقول اى حاجة من اللى قولتها )- امال حضرتك مهندسة ازااااى يا طنط- (مش انا بقيت من القرون السابقة خلاص  عادى بقيت طنط وتيتة كمان ) وحضرتك بتقعدى على الانترنت بتعملى ايه ؟؟ شكلك كدة مقضياها شات روومز وماسنجر بس -( ف سرى اتمنيت اشيل منهح الانجلش من  المناهج واحط بداله كيف تخرط الملوخية اهوه  حاجة  تنفعها ف مستقبلها برده) - 
وبعدين  امال كنتى وانتا صغيرة  وف سني  بتعملى ايه من غير كونكر؟؟ انا مش عارفة انتى مش عارفة ازاى كونكر يعنى؟؟؟ هوا انتى مش بتلعبيها مع  طنط ماجى -( امى كانت اسمها ماجدة  والله مش عارفة ايه ماجى ده بس مش مشكلة )- ولا طنط ماجى  بتلعب silk road
وجووووووووون  وجوووووووووووون وجوووووووووووووووون  انا كدة عرفت ايه كونكر ديه  احمددددددددددددددك  ياااااااارب  ده انا  حسيت  احساس الموظف لحظة خروجة من المعاش فعلااااااا  احمدك يارب . انا كنت عايشة ازاى من  غير مااعرف يعنى ايه كونكر !!!! فعلا شئ مهم  انك تعرف  كونكر وحيحطوه من  الحاجات  الاولية بتاعت الاقتصاد ديه .
الجيل الرابع : انا اسفة يا هالة -( من ابلة ل طنط ل اسمى حاف وبعد كدة  لو قالت بت عاااتى برده خلاص) - مش هينفع ت join  معانا ف التيم -( وربنا ل مكرهاها  ف الانجلش بس اصبرى عليا اصبرىى ى ى ى  ى )- عشان فعلا  الموضوع مش هيبقى fair  كدة عشان احنا رفضنا  ناس خبرتها ف كونكر  اكتر من تلات سنين  ف مش حدخل حد  مش يعرفها اصلا كدة يبقى فيه - segregation - (وجوووووووووون انا كنت بدور على الكلمة ديه من ثانوى انى افتكرها  هيا تقريبا تفرقة عنصرية) - عامة قدامك اسبوع تتعملى  كونكر وتدربى عليها  والديد لاين بتاعك عشان ابدا العب معاكى الاسبوع اللى جاى -( ديد لاين !!! انا سمعت الكلمة ديه كتير ف الكلمة بس ولا يهمنى هعمل عبيطة وجاية من اول الشارع ) - ده اللى اقدر اساعدك بيه.
الجيل التالت : يااه  يا نهى بجد؟؟ميرسى يا جميلة  بجد ...قصدى يا اشوووك حاضر هتعلمها وهجيلك الاسبوع اللى جاى نلعبها سوا.
الجيل الرابع : قصدك امرنك عليها يا هالة .
الجيل التالت :  ايوووووووووووووة يا نهى - وانا نفسى اتحول ل ديناصور ساعتها - ميرسى سووو  ماتش.
الجيل الرابع : you are  welcome  hala 


انا  قولت  كل التفاصيل  طبعا  ولكم  ان تتخيلوا شكلى  وانا  ف الحوار كان  عامل  زى اللى دخل امتحان  ميكانيكا وكان فاكرها اقتصاد زراعى. بس جه ف بالى مثل حلو اووى ماما كانت بتقوله - ( ولازالت ب صراحة يعنى بس متركزوش)  - : 
جتها  نيلة اللى عايزة  خلف 


مش عارفة ماما كانت بتقوله  ليه بس تقريبا ممكن تكون  قابلت حد من الجيل الرابع... اكيد مش ليا يعنى ده انا غلبانة ومستكينة واتسم ب الهدوء واشارك ف الاثاث من سيد سعد كمان.


كان  معكم اول  بوست وربنا  يستر مااتشلش ويبقى اخر بوست ادعولى اعدى الاسبوع ده عشان اعرف العب-( اتمرن)  - مع نهى على كونكر ومش تخنقنى  او  تحولنى بوكيمون  لو كان لسة موجود. 


يلا سلام ;)

بسم الله الرحمن الرحيم

موسى
قال شالوم .. يسوع قال سلام لكم .. مُحَمَّد قال السلام عليكم .. كريشنا
انحنى لروح الإله في أخوه .. زرادشت قال ليكُن نور لكم .. وبهاء الله قال
البهاء عليكم ..السلام لكم جميعاً

السلام عليكم  ورحمة الله وبركاته .... 

حبيت ابدأ اول  كلامى ب تسمية الله .. 


غريبة؟؟ ليه؟؟ مش هوا  اى حد مننا اول ما اتولدت قالوا بسم الله الرحمن الرحيم او بالمعنى  المصرى الاصيل : سموا عليه


انا بالظبط  بعمل كدة


بسمى على بنتى ,, ومدونتى .. بمناسبة .............ولادتها ...........


يلا بينا؟؟ يلا بينا  :D  


بسم الله الرحمن الرحيم