استبحس خريفى معتدل مائل الى مماس حياتى

انا عندى صداع ساعة يروح اااه...وساعة يييجى.. 

بقالى كتير مش كتبت او دونت اخر بنات وولاد افكارى لذلك قررت قرارا مصيريا.. ولن ارجع فيه..لقد قررت ان اتنحى.. (مع التحيات لابو سمرة :) ).. عن 

كل الصداع الفكرى اللى بيصول ويجول جوايا ده ..واعود الى صفوف الناس بلا اى صداع..

عندى شوية افكار بتلعب ف دماغى ومش عارفة ليها اى حل..او يمكن الاستبحس بتاع كل سيزون ده هوا السبب..

عندى شوية مواقف كدة وعايزة حد يرد عليا لو ده صح او غلط عشان انا غلب حمارى وحصانى وكل حديقة حيوانى ديه.. بس حديقة الحيوان بتاعتى فيها 

زرافة..هبقى اعمل تذاكر عشان تزروها مش تقلقوا  :D.

ملحوظة : اصحاب القلوب البريئة ومحبى تامر  حسنى مش مستحب ليهم يقروا البوست..عشان بس جونسون ولا دموع بعد اليوم.. 

.................................................

1- ليه بنقابل ناس وبنلاقيهم  ناس تانية لما الظروف تختلف..يعنى تلاقى اللى بتضحك اووى وتهزر على الفيس بووك وعاملة فيها صاحبتك لابسة القناع الحلو 

ده مع كل الناس ومن وراك بتتكلم  عليك . لاء والبجاحة كمان انها فرحانة  انها عارفة حاجات كتير على كل حد وبتتكلم على اساس انها  عرفت اسرار القمة 

وماشية لكل الناس  تقول اخبار ديه كذا وديه قالت وديه  سوت.واول ما تشوفها ف وشك تعمل  فيها دور البريئة ..مع ابتسامة صفرا اخبارك ايه..نفسى بجد 

اقولها كلمة حلوة.. طب ابقى اغسلى سنانك ب سيجنال تو عشان فعلا الابتسامة صفرا اووى.

........................................................

2- ليه بقيت بحس ان كل واحد فعلا مش همه غير نفسه وبس!! ليه بجد كدة؟؟ يعنى مثلا لو عندك مشروع او حاجة عادى هتتكلم وتهزر مع كل الناس وممكن 

تسيب شغلك عشان خاطر فلان  عايزك او علان متضايق وتشوف ماله..انما بقى الناس الحلوة ديه .. ياربىى على الفقعة اللى بحس بيها منهم بجد.. هما تلات 

كلمات لما يبقى ليك عوزة اصلا.ازيك ..عامل ايه..بقولك ايه عملت ديه ازاى..طب سلام.... وياريت حتى فيه سلام.. لاء واللى يفقع اكتر ويشل ويجيب كل 

امراض العصر اللى ممكن تجيلك لو شربت مياة النيل بالظبط.. لما تليفونك يرن والمفروض انك بقى تبقى 24 ساعة جنب التليفون ولو لاقدر الله حد استناك 

يبقى  عيب عمل المعصية الكبرى خلاص ..وتلاقى حقوق مكتسبة كتيير اووى وانتا نفسك تفهم هوا فيه ايه..انا بجد بقول هوا فيه ايه اربعة وعشرين ساعة 

دلوقتى من اللى شايفاه..فعلا نفسى اجيب  بلاستر عشان مش اصرخ فى حد او اصرخ من اللى جوايا فعلاااا.. هوا الناس بقوا ناس غريبة ولا انا اللى رايقة 

اووى ولا ايييييه بقى ..

....................................

3- ليه لما تبتسم ف وش حد تبقى غريب لاء والمفروض بقى  تبقى مكشر  اربعة وعشرين ساعة زى بقيت الناس طالما كل شئ فيه مشاكل والحياة بايظة 

بقى..نفسى اقول للى مكشر ده بجد كلمة .. البسمة مش بفلوس والله.. 

................................

4- ليه لما حد يقولك نفسك تبقى ايه بكرة وتقوله كذا يقولك ابقى قابلنى..انسى يا عمرو.. عشم مبارك ف نوبل للديموقراطية..هوا ياجدعان خلاص بقى كل شئ 

حرام حتى الحلم؟؟ مش هقولكم احلم والخيال يتحقق وكل كلام كتاب العربى مغامرات ف اعماق البحار خامسة ابتدائى اللى صحى من النوم ف الاخر بس 

هقولكم ..اسعى يا عبد .. هوا فيه ايه احنا اتخلقنا كدة وخلاص يعنى.. طب خلاص بكرة هبقى اروح اشقر على المقابر بقى واقضى الويك اند فيها طالما مليش 

لازمة..  

...............................

5- ليه كبرنا؟؟ والله مش قصدى انى  اتريق ونظام بقى الستات اللى بيفضلوا عندهم 23 سنة كل سنة لحد ماتموت وهيا عندها 90 سنة ويقولك ماتت مخطوفة,, 

بس فعلا ليه مرة واحد بندرك اننا كبرنا وخلاص عمرنا اتسرق مننا..انا عن نفسى بقيت اخاف ابص لنفسى ف المراية لمجرد حاسة انى معملتش اى شئ ف 

حياتى مفيد.. غير انى كبرت.. وده ف حد ذاته مفيد عشان مقتلش احمد زكى بدر او اعمل اى مصيبة فيه  من المهازل اللى بتحصل وقاللك حزب وطنى ف 

دراسات اجتماعية ...عند خالتى اطاطا الكلام ده والله بس الرقابة بقى .. بس فعلا ليه كبرنا؟؟ 

....................................

6- ليه بقيت احب اقعد ف الضلمة.. يمكن مش كلنا كدة بس فعلا بقيت حاسة انى  عايشة ف الضلمة  23 ساعة ..اصحى من النوم اقعد على اللاب ف 

الضلمة.. وانام ف الضلمة..واشوف حاجات بتحصل غلط قدامى وبرده عايشة ف الضلمة ومش عارفة اغير لمجرد انها بقت حاجات عجز العلم والعقل عن 

حلها.. او عجز نظام التوريث عن انه يتيح لنا فرصة بس التفكير لحلها.. هوا اللون الاسود بقى حلو اووى كدة ؟؟ ولا عشان خالى من اى تفاصيل ومش ملفت 

وعامل زى سجون القناطر..هيا فعلا سجون القناطر..بس نفسى اعرف ازاى سجون..وقناطر.

.................................

7- ليه بتبقى وسط الناس قديس وف خلوتك ابليس.. وسبحان الله تلاقى نفسك اول ما تبقى وسط الناس وجت سيرة حاجة كويسة او تتكلموا ف الدين تتحول مرة 

واحدة للشعراوى بس مش اللى عارفينه..ده واحد تانى كدة بيشد ف شعره من اللى بيشوفه. واول ما تروح وتلاقى ايها مشكلة ف البيت او تواجهك مشكلة 

..يتحول الشعراوى ده لواحد متعصب ويشتم ويعمل وتقول ازاى ده عمل وده سوا.. وهنيالك يا مقطع فروة الناس بكرة هتروح جهنم هتتباس..

...............................

8- ليه الصراحة من وجهة نظر الناس بقيت بجاحة وقلة ادب والنفاق بقى ذوق .. وليه الصح والغلط بقى مطاطى اوى كدة.. وليه لو قولت رأيك يقولك بطل 

فذلكة.

..............................

9- ليه كلمة صايع بقيت حاجة حلوة مع انها كانت شتيمة زمان..والكلام ليا اول الناس يعنى..ينى يقولك ده صايع ومقطع السمكة وديلها..ولما تبقى شطور شوية 

مش يتقالك زى زمان الشاطر عمرو..يتقاللك يا قرد..براوة عليك ياض..ايه الاسلوب ده ..هوا العربجية مع الاحترام ليهم بس استعمروا مصر امتى؟؟

................................

10 - ليه  التفاهة يا جدعان ونشد مع بعض اصلا بسبب ده قال وده بص ونظراته ومش عارف ايه وبنطلونه بيدايق عينيا وخربشنى ياابلة ف ايديا وكل الهبل 

ده.. طول عمرى شايفة ان اى خناقة بين البشر ماهيا الا شوية هبل بيحصل وشيطان مذاكر مع اول ثانوية عامية . وهتتحل ..بس واضح انى ياما غلطانة ياما 

فعلا شوشو الثانوية العامية بتاعته بقت سهلة اووى ف بقى شاطر اووى..ياجدعاااااان هيا مرة واحدة هنعيشها..نفسى اقول لكل اصحابى اللى متدايقين من حاجة 

او مدايقين حد ف حاجة..بلاش هبل.. هالة..اتكلم طبيعى ..واشرب طبييعى ..اعلى اساس انك هتشرب صناعى ا عن طريق انابيب ف مناخيرنا مثلا ..مع 

تحياتى لجهينة.

..............................

11- هيا الحياة فيها ايه عشان نبكى عليه...تراللململلملم..لاء بجد هوا فيه ايه..هيا كل الحياة بقيت شوية خروجات على شوية كلام يتحفظ قبل الامتحانات يتسمع 

ف الامتحانات..على شوية مشاكل عاطفية وازمات تنتهى بانك تتجوز عصمت بنت طنط عطيات.. وتجيب منها زغلول وفتكات..وتشتم نفسك عشان تجيب ليهم 

شوية قريشناات..بجد حلوة اووى حياتك ومبروك عليك احلى ممات..حياة بدون اضافات..ترالململم.. فعلا مبروك على الناس التافهة ديه حياتها لو كانت عبارة 

عن الكلام ده.. اللهم استخدمنا ولا تستبدلنا.

.................................

12  مليش نفساكمل كتابة ,  كفاية اكتئاب اكتر من كدة انا  زهقت منى ومنكم ومن مشاكلنا ديه وهقوم انتحر..يلا لا اله الا الله..ادعولى ب انتحار كويس عشان 

مش عايزة اتعور عشان الماكيب بقى..عشان ابقى حلوة لما اقوم من الموت بقى يوم القيامة.. وهنيالك ياكارينا ويا اوريفليم..وايفون..وماى واى..وكل الحاجات 

الحلوة اللى هتودينا الجنة حلوين ان شاء الله..